Ispadas de sole • Coro Ortobene
Ispadas de sole
1997
Testo: Franceschino Satta
Musica: Alessandro Catte
Direzione: Alessandro Catte
Solista: Carlo Spanu
In sos pichidos angrones de s'anima
allattaos dae s'odiu,
corruschian ammentos de focu,
cupinde
traschias de malissia.
Sun frizzas de benenu
chí mi brusian s ispiritu.
Sos ocros sumortios
juchen pezzi sa grista 'e s'ispramu,
pantarma seculare
de una terra iscarrainza,
orfanada.
Sun frizzas de benenu
chi mi brusian s ispiritu.
Sos campos lucorosos de sa bida,
fattos de selenos canticos d'amore,
sun inoche,
intro 'e su coro meu,
e dego, massaju e pistichinzos,
cherjo semenare labores d'affettu
fulliandeche,
in sas percas fungudas de s'irménticu,
sas lubas ch'abbelenan s'anima.
Cherjo binchere,
gherrande chin ispadas de sole.
Sos granos de su coro
no iffroscan
in rubos de malissia.
Cando sa luche 'e s'anima
s'isparghet in agheras durches de chelu
tando sa terra est cussoria e meravillas.
