Napule mia

NAPULE MIA Grare, viche e vvicarielle, panne spase cu 'e mmullettelle, 'mpónt’ ô vico na cappella, sempe luce 'a Madunnella. Capemonte e 'a funtanella, Marechiaro e 'a fenestella, Margellina, cu 'e vvarchetelle e Ttuleto cu 'e bbancarelle. (Rit.).Cammenanno mo te conto 'e bbellezze 'e 'sta città, tu te pienze ca è nu suonno mmece è ttutta verità. Piererotta e 'a canzuncella, Carnevale cu Pulecenella. 'o teatrino d' 'e gguarattelle, 'o mandulino e 'a tarantella. Castagnelle, 'e ttamburrèlle, e 'e scugnizze e 'a guainella, ll'acquajola cu 'a mummarella, 'o père, 'o musso e 'a cientepelle. (Rit.).Cammenanno mo te conto 'e bbellezze 'e 'sta città, tu te pienze ca è nu suonno mmece è ttutta verità. (Rit.).Cammenanno mo te conto 'e bbellezze 'e 'sta città, tu te pienze ca è nu suonno mmece è ttutta verità. e 'a capera cu 'o tuppetiello, e 'o scarparo cu 'o bbancariello, 'o ccafè, na tazzulella, tutt'arèto a 'o pazzariello! Riccia o frolla 'a sfugliatella, 'o babbà e 'a zeppulella, cu 'a pummaròla e 'a muzzarella 'a Margherita è 'a regginella. (Rit.).Cammenanno mo te conto 'e bbellezze 'e 'sta città, tu te pienze ca è nu suonno mmece è ttutta verità. Maluocchie e ccurnicielle, bella 'mbriana e 'o munaciello, 'o bancolotto cu 'e nummarielle, e 'o panaro cu 'a tumbulella. Pizze fritte e ppagnuttielle, maccarune e vvermecielle, 'o Rraù cu 'a tracchiulella, e 'e ssacicce cu 'e friarielle. (Rit.).Cammenanno mo te conto 'e bbellezze 'e 'sta città, tu te pienze ca è nu suonno mmece è ttutta verità. tortano, e ccasatiello, roccocò cu 'e susamielle, 'o Presepe, cu 'e pasturielle, 'e zampugnare e ‘o bbammeniello. San Gennaro cu 'a cappella, 'o Vesuvio cu 'o Castiello, 'o cucchiere cu 'a carruzzella, Napule mia si' troppa bbella! (Rit.).Cammenanno mo te conto 'e bbellezze 'e 'sta città, tu te pienze ca è nu suonno mmece è ttutta verità. ******* Autore: Gianni Polverino arrangiamenti: Rino Morra cantante: Lello Ferraro © 2026 Gianni Polverino